Kocha mkuu wa Azam FC, Muingereza Stewart Hall amesema, amefurahia ujio wa mshambuliaji Ame Ali kwenye kikosi chake na hana wasiwasi naye.

 

Ame ni mchezaji pekee aliyesajiliwa na Azam msimu huu akitokea Mtibwa Sugar na ujio wake, ulibarikiwa na Stewart mwenyewe.

 

“Ame ni mchezaji mzuri, namjua na nilikuwa nikimfuatilia alipokuwa anaichezea Mtibwa. Naamini uwepo wake utaisaidia Azam msimu huu,”alisema Stewart.

 

“Alipendekezwa kwa mujibu wa ripoti iliyopita na kabla ya kusajiliwa, uongozi uliniuliza kwanza kama atanifaa na mimi niliwajibu sawa, wakakamilisha mipango.”

 

Hata hivyo, Ame bado hajaanza mazoezi na Azam, yuko kwao Zanzibar, alirudi mara tu aliposaini mkataba huo kwa ajili ya kujipanga zaidi.