Timu ya Azam FC imemkaribisha kocha wake wa zamani Stewart Hall kwa kuifunga Coastal Union 4-1 kwenye mchezo wa ligi kuu uliochezwa leo, Uwanja wa Azam Complex Chamazi.

Azam FC leo iliongozwa na kocha huyo kwenye benchi la ufundi ikiwa ni siku moja baada ya kuwasili kuifundisha timu hiyo, pia ni siku nne tangu kusitisha mkataba wa kocha Boris Bunjak 'Boca' aliyeiongoza timu hiyo tangu kuanza kwa ligi kuu ya Vodacom (VPL) 2012-2013.

Katika mchezo huo wachezaji walicheza kiwango kizuri wakitumia mtindo wa kocha huyo ambao ni kucheza mipira ya chini huku wakifanya mashambulizi.

Azam walipata bao la kwanza dk 22 ya mchezo huo kupitia kwa mshambuliaji Gaudence Mwaikimba aliyefunga kwa kichwa akimalizia krosi ya Samih Nuhu

Bao hilo la Mwaikimba ni goli lake la kwanza kwenye ligi kuu tangu asajiliwe na klabu hiyo katikati ya msimu uliopita akitokea Moro United.

Dk 36 mshambuliaji Kipre Tchetche alionyesha umahiri wake kwa kuipatia Azam FC goli bili baada ya kuwapita mabeki na kumzungusha kipa wa Coastal Union, Jackson Chove na kuachia shuti lililokwenda moja kwa moja wavuni.

Kipindi cha kwanza kilikua cha Azam FC dk 45 Khamis Mcha Viali aliipachika goli la tatu kwa shuti kali lililogonga mwamba na kuingia wavuni akimuacha kipa wa Coastal asijue la kufanya, timu zilienda mapumziko Azam FC ikiwa mbele kwa 3-0 dhidi ya Coastal.

Katika kipindi cha pili kasi ya Azam FC iliongezeka na kuongeza goli la nne lililowekwa wavuni na Mcha aliemalizia mpira wa mwisho wa Salum Abubakar 'Sure Boy'.

Goli pekee la Coastal lilifungwa na Jerry Santo katika dk 87 akitumia uzembe wa beki ya Azam FC na kupiga shuti lililokwenda moja kwa moja wavuni wachezaji wa Coastal Jamal Machelenga na Daniel Lyanga watajutia nafasi za wazi walizopata kwa kupiga mipira nje na mwingine kuokolewa na kipa Mwadini Aly wa Azam FC.

Ushindi huo wa 4-1 umeipeleka Azam FC kwenye nafasi ya tatu ikiwa na pointi 21 nyuma ya Simba na Yanga zenye pointi 23 kila moja, lakini Azam FC bado wanamchezo mmoja mkononi.

Baada ya kumalizika mchezo huo kocha Stewart aliwapongeza wachezaji wake na uongozi mzima wa Azam FC kwa kurejea katika kikosi hicho na kuahidi kuendeleza mapambano katika mechi zijazo ikiwepo mechi ya Jumapili dhidi ya Yanga itakayochezwa uwanja wa Taifa jijini Dar es Salaam.

Kikosi cha Azam FC kilichomkaribisha kocha huyo Mwadini Ally, Ibrahim Shikanda, Said Morad, Agrey Moris, Samih Haji Nuhu, Jabir Aziz, Michael Bolou/Ibrahim Mwaipopo 69', Salum Abubakar 'Sure Boy'/Himid Mao 76', Gaudence Mwaikimba/Abdi Kassim 'Babi', Tchetche Kipre na Khamis Mcha Viali.