Himid aenda kufanya majaribio Randers

Category: 
Team: 
Azam FC

UONGOZI wa Klabu Bingwa ya Afrika Mashariki na Kati, Azam FC, unapenda kuwajulisha wapenzi wa soka kuwa kiungo wao Himid Mao ‘Ninja’, amekwenda kufanya majaribio ya kucheza soka la kulipwa nchini Denmark.

Himid tayari ameondoka nchini tokea jana jioni, na atakuwa ndani ya moja ya timu kubwa za nchini humo, Randers FC ambayo ipo kileleni kwenye Kundi la kwanza ikiwa na pointi 41 kwenye msimamo wa Ligi Kuu ya Denmark maarufu kama Danish Superliga.

Majaribio ya kiungo huyo yatachukua siku 10 kwa mujibu wa makubaliano kabla ya kurejea nchini na taratibu nyingine kuendelea baina ya timu hizo mbili, endapo watakuwa wamevutiwa na huduma yake.

Azam FC inaamini kuwa Himid Mao atafanikiwa kwenye majaribio yake hayo kutokana na kiwango kikubwa alichokuwa nacho hivi sasa na inamtakia kila la kheri katika mtihani aliokuwa nao mbele yake.

Tunaamini kuwa kufaulu kwa Himid kutazidi kuitangaza Azam FC kimataifa na kufungua milango kwa wachezaji wetu wengine na Tanzania kwa ujumla kucheza soka la kulipwa nje ya nchi, ambao hapo baadaye watakuja kuisaidia vilivyo timu ya Taifa ya Tanzania kutokana na uzoefu mpya watakaokuwa wameupata huko.

Hii ni mara ya pili kwa Azam FC kutoa mchezaji wake kwenda kujaribu bahati nje ya nchi ndani ya msimu huu, itakumbukwa kuwa tayari Desemba mwaka jana imefanikisha safari ya winga wake, Farid Mussa, kujiunga na Club Deportivo Tenerife inayoshiriki Ligi Daraja la Kwanza nchini Hispania.

Azam FC itaendelea na utaratibu wake mzuri wa kutowazuia wachezaji wake kwenda kutafuta bahati za malisho mazuri nje ya nchi, tunaamini kwa kufanya hivyo tutakuwa tumejitangaza kimataifa na pia kuusaidia mpira wa Tanzania.

Imetolewa na Uongozi wa Azam FC 

Mei 02, 2017

Back to Top